Një ‘luftë’ e fortë duket se po ndodh për kreun e 100 këngëve më të mira shqiptare në “The Top List”. Por a mund të quhet vallë vërtetë luftë kur kemi dy miq dhe kolegë të mirë?
E këtu po flasim për Ledri Vulën dhe Yll Limanin. Shumë pak diferencë po ndodh nga java në javë mes dyshes.
Kur një javë kemi Ledrin në vend të parë, javën tjetër e rrëmben Ylli, si dhe anasjelltas. Këtë javë kemi pikërisht Ledrin në krye me “Oj Oj Oj” e teksa Ylli është vetëm një hap larg, në vend të dytë me “Dje”.
Ndërkohë javën e kaluar ka qenë ky i fundit që pozicionohej në fron, e Ledri në vend të dytë. Këtë ‘betejë’ për kreun në fakt e kemi hasur prej 4 javësh tashmë.
Kurioziteti vijon të jetë se kush do të jetë në krye të listës javën e ardhshme, Ledri apo Ylli? Apo mos ndoshta do të kemi ndonjë surprizë tjetër? E gjitha mbetet për t’u zbuluar të shtunën!
