I ftuar në emisionin “Pardon My French” në Top Albania Radio nëpërmjet një lidhjeje telefonike ka qenë Klajdi Haruni. Këngëtari i njohur i cili së fundmi është bërë baba ka treguar më shumë rreth kësaj eksperience të bukur dhe mjaft të re për të sigurisht. Ai ka zbuluar se sapo ishte kthyer nga Franca dhe ndodhej me vajzën e tij në krahë gjatë momenteve që po fliste me Jonidën dhe Elonën.

Si ka qenë ky udhëtim i parë për Klajdin kur e dinte se në kthim do ta priste vogëlushja e tij?

Këtë radhë ka qenë dhe udhëtimi im i parë jashtë pas lindjes së vajzës dhe kam qenë gjithë emocione dhe gjithë merak. Me gjithë dëshirën për t’u kthyer në shtëpi. Edhe i kam shkruar partneres dhe më ka shkruar. Emocione të bukura. 

Pse kanë zgjedhur Klajdi dhe Orgesa emrin Hea? Cili është kuptimi i këtij emri të veçantë?

Për mua dhe për nusen ka qenë shumë e veçantë si histori. Kemi parë një listë me 10 emra dhe ndaluam të dy tek emri Hea. U munduam që të gjenim ndonjë më të bukur por ky ishte dashuri me vendim dhe shikim të parë si thuhet. Hea do të thotë mirësi, hijeshi pra të mirë si mami dhe babi. Emër korean. 

Si po shkon jeta familjare, a janë mësuar me ndryshimin e rutinës dhe gjithçka tjetër tani që çifti janë bekuar me një fëmijë?

Po e shijojmë, normalisht me ato vështirësitë e veta të fillimit. Unë po e shijoj shumë, është edhe shumë herët për të folur por akoma nuk e kam marrë veten tamam më duket vetja si në një ëndërr shumë të bukur që na ka bekuar Zoti. Po e përjetojmë dhe  po e përballojmë shumë mirë për momentin. Po ia dalim, mendoj që jam një baba që ndihmoj por varet edhe si mendon mamaja. 

Kujt i ngjan më shumë?

Mendoj që është një mix midis të dyve. Njerëzit e Orgesës thonë që i ngjan asaj ndërsa njerëzit e mi thonë: “Ua kopje si ti”. 

Përveç eksperiencës së tij si baba nuk mund të mungonin edhe pyetjet në lidhje me muzikën dhe karrierën e tij. Duke qenë që Xhensila Myrtezaj dhe Klajdi sollën në BBV këngën e tyre më të re “Yjet” por ende nuk kanë nxjerrë videoklipin e saj, Jonida e pyeti se kur pritet që dyshja ta publikojnë atë?

Ne e duam shumë atë këngën dhe klipi është shumë i bukur, gati në përfundim dhe do ta kemi shumë shpejt për të gjithë. Besoj që do të jetë shumë shpejt por nuk di një datë sepse me këtë këngë na kanë dalë afatet shumë herë. Është një projekt që është bërë me shumë dashuri sepse kemi pasur goxha xhirime të ndryshme, e kemi xhiruar disa herë klipin sepse nuk ka dalë ashtu si kemi dashur ne. Por shpresoj që e kemi shumë të bukur dhe me dashuri. 

A është duke punuar Klajdi me ndonjë projekt të ri sa i përket fushës së muzikës?

Të tregoj të drejtën këto 10 ditë nuk e kam pasur mendjen fare. 

Duke u rikthyer edhe njëherë tek ardhja në jetë e vajzës Hea, Elona e pyeti Klajdin se cila ka qenë dhurata që Flor Mumajesi i ka bërë kur lindi vajza?

Dhurata e parë fare që ka qenë një nga më të shtrenjtat për mua ka qenë kur sapo kisha marrë vesh lajmin që Orgesa është shhtatzënë dhe kur kam shkuar në studio për t’ia thënë Florit dhe ai ka bërë një melodi shumë të bukur. Atë që kemi vendosur tek klipi për Gender Reveal dhe kjo besoj që është dhurata që vlen më shumë nga të gjitha.