“A je bre normal” është një emision dinamik dhe energjik që ofron intervista ekskluzive me emrat më të njohur të showbiz-it, veçanërisht ata që kanë lënë gjurmë në industrinë e muzikës hip hop. I ftuar në episodin e radhës me Meriton Mjekiqin, ka qenë Blerando, i cili ka folur më shumë për fillimet në muzikë, qëllimet e tij, si dhe albumin e ardhshëm…

Cilat kanë qenë qëllimet e tua me muzikën?

Për herë të parë kur kam nisur të bëj një këngë, kam qenë në dhomën time duke dëgjuar një audio piano. U inspirova shumë dhe kam shkruar një këngë për dashurinë, në shqip, sepse nuk ndihesha rehat në gjuhën gjermane. Kështu ka nisur. Pastaj dalëngadalë nisa duke ndryshuar pak stilin.

Cili ka qenë pikësynimi yt, për të fituar para apo për kënaqësi?

Nuk kam pasur qëllim, kur nisa të bëj muzikë. Kam qenë duke studiuar dhe e ndieva veten se çfarë dua të bëj. Gjithmonë e kam pasur ëndërr të bëj muzikë dhe kam pasur kontakte me muzikën që kur isha i vogël. Qëllimi ka qenë vetëm që ndjenjat e mia t’i hidhja në letër.

Ti je rritur në Gjermani, pse zgjodhe që të bëje këngë në shqip dhe të mos futeshe në tregun gjerman?

Kur e nisa muzikën, doja vetëm të shprehja ndjenjat e mia. Ka qenë pak zor për mua që të shprehesha në gjuhën gjermane. Nuk ndihesha rehat. Së fundmi kam bashkëpunuar me një producent në Vjenë dhe për herë të parë kam bërë një këngë gjermanisht, e kam parë dhe që më shkon. Më parë ndihesha më rehat në gjuhën shqipe. Mendoj që arti është si ta ndiesh. Kjo duhet të vijë natyrshëm, nuk mund ta sforcosh.

Zakonisht videoklipet e tua janë të shtrenjta, i bën ose në Amerikë, ose në ndonjë vend tjetër. A ka përfitime?

Normalisht që ka përfitime. I jap shumë rëndësi videoklipeve. Është mënyra më e mirë për të përfaqësuar këngën tënde.

Ke nisur të punosh për albumin tënd, cilët janë artistët që do të dojë t’i kishe pjesë në të?

Sigurisht që njeriu ka qejf që të punojë me artistë të mëdhenj, por nuk do thoja dikë në veçanti. Ka pasur zakonisht dhe emra të mëdhenjë që kanë bashkëpunuar, por kënga nuk ka qenë e mirë. Nëse nuk ec kënga, nuk ka rëndësi as emri.

Si do të mbajë titullin albumi?

Albumi momentalisht nuk ka ende një titull. Rryma do të jetë afro pop, janë disa rryma të ndryshme, kam edhe trap. Kam një bashkëpunim shumë të fortë aty, por nuk dua të flas për momentin për këtë pjesë. Albumi do të ketë 11 këngë.