I ftuar në Top Albania Radio ka qenë artisti i njohur, Dren Abazi. Një emër mjaft i dashur i muzikës së mirë shqiptare. Ai tregoi më shumë detaje në lidhje me koncertin e tij që do të realizojë në qytetin e Shkodrës dhe jo vetëm kaq.

12 vite nga “Ti dhe unë”, gjithmonë prezenca e tij jo vetëm në Shqipëri dhe Kosovë por kudo që ka shqiptarë dhe e duan muzikën e tij është shumë aktive. Dren Abazi nuk është shkëputur asnjë moment nga muzika, por çfarë e ka mbajtur kaq afër me njerëzit?

Kjo besoj që është diçka reciproke, sidoqoftë nuk besoj që ka një formulë të saktë të asaj se çfarë duhet të bësh në veçanti për të qenë konsistent në muzikë dhe në skenën tonë, në tregun që e kemi. Besoj që është proces i një pune të vazhdueshme dhe një pune që nuk ndalon. Unë gjithmonë them që kjo është një punë qe ne nuk e ndalojmë, humbasim gjithçka duke u nisur edhe nga fakti që është një dinamikë. Pauza është gjithmonë e lirë që ta bësh por është një rrezik permanent që njerëzit munden që të të harrojnë shumë shpejt në qoftë se ti nuk je aty, nëse nuk je i prekshëm për ata. Këtu luan një rol të madh edhe të qenurit aktiv në skenën e ‘live’-it sepse nëse ti je prezent në TV me videoklipe padyshim që kjo është një pjesë shumë e rëndësishme e të gjithë këtij procesi. Por unë besoj të paktën tek unë sepse po flas për veten, një rol shumë të rëndësishëm në kohëzgjatjen time në skenë se jam bërë gati 15 vite, është që unë kam qenë aktiv në skenë me koncerte, kam qenë i pranishëm në eventet live, në koncertet që janë bërë në sheshe, në klube. 

Një këngëtar i cili numëron edhe shumë klipe padyshim.

Shumë është relative sepse tani i kemi këto ‘hip-hop’ artistë që hallall ju qoftë sepse janë shumë punëtorë. Kjo varet nga këndvështrimi, puna e produktivitetit. Besoj që edhe kjo është një vijë e hollë që e ndan atë që ti mundësh të bëhesh i mërzitshëm dhe imponues edhe pjesa tjetër. Unë e mendoj, nuk domethënë që është mendim i drejtë por unë e kam parë gjithmonë të arsyeshme që ti nxjerr dy këngë në vit edhe mos të bëhem edhe shumë bajat. 

Data 7 maj, një datë shumë e rëndësishme për Dren Abazin dhe për karrierën e tij muzikore. Një koncert ndër më të veçantët sepse do të ketë një pjesëmarrje prej më shumë se 90 muzikantësh, instrumentistësh. Pse vendosi që këtë koncert artisti ta bëjë në Shkodër?

Është e vertëtë që për mua është një moment shumë i rëndësishëm në karrierën time sepse është një koncert shumë ambicioz mbi të gjitha. Nuk është e lehtë të bësh një koncert të tillë me orkestër simfonike dhe kor, besoj që janë të rrallë muzikatët apo këngëtarët në botë që e bëjnë këtë për arsye të ndryshme. Jam shumë krenar dhe shumë falenderues për rastin. Për mua është koncerti i parë simfonik. Shkodra jo për ndonjë arsye të veçantë, thjesht Shkodra ka rikthyer orkestrën simfonike pas 35 ose 36 vitesh. Tani është rikthyer dhe është mjaft e rëndësishme sepse është djepi i kulturës dhe i artit. Koncerti do të mbahet në sheshi përpara bashkisë, një shesh shumë i bukur dhe vërtetë i mirë dhe i përshtatshëm. Ideja ishte që ta bënim në kala por hasëm disa probleme. 

Çfarë pritet të ndodhë dhe a është entuziast Dren Abazi?

Unë jam shumë entuziast për këtë pjesë dhe nesër do të udhëtoj për në Shkodër, kam ardhur vetëm për këtë intervistë. 

Në karrierën e tij kaq të gjatë, Dren Abazi është një artist që nuk e ka humbur kurrë fokusin nga muzika e mirë dhe cilësore.

Unë besoj se procesi i krijimit të një kënge është një punë sistematike kur ti e bind veten që duhet të shkruash diçka, unë i shkruaj vetë këngët. Unë besoj që gjithmonë këngët melankolike janë ato më të fuqishme dhe ato me kohëzgjatje më të madhe për vetë faktin se melankolia si emocion ose dhimbja është shumë më e fortë se sa gëzimi.