E ftuar nëpërmjet një lidhje telefonike në “Ndryshe” me Salsano Rrapi dhe Elona Duro ka qenë këngëtarja Vanesa Sono. E rritur në Sarandë e tashmë rezidente në Londër, vazhdon studimet e larta në muzikë në shkollën “ICMP”. Vanesa ka qenë përfaqësuess e Shqipërisë në IFLC USA në moshën 15 vjeçare, dhe IFLC Australia një vit më vonë.
Ajo ka qenë gjithashtu pjesë e grupeve pop/ indie në Angli. Vanesa ka qenë e ftuar në televizionin BBC për prezantimin e këngës “Slay me”. Prej disa vitesh ajo ka nisur pjesëmarrjen në konkurse muzikore në Shqipëri dhe me disa nga këngët e saj është bërë pjesë edhe e klasifikimeve të The Top List në Top Awards.
Në lidhje me mësimet e saj në Londër, ajo u shpreh:
Unë studimet i kam mbaruar. Studimet e larta. Sapo jam diplomuar. Kështu që për momentin jam totalisht duke u marrë me muzikën. Ka qenë më tepër formim i përgjithshëm që unë kam bërë. Është quajtur “Creative Musicianship”. Kemi pasur, normalisht si çdo universitet që ka të bëjë me muzikën, me produksionin e muzikës, me kompozimin e muzikës, me këndimin normalisht. Normalisht pastaj edhe ana teorike, që kanë të bëjnë edhe me shkrimin e eseve, këto gjërat që nuk na pëlqejnë.
E pyetur se kur do të bëhet ajo si Dua Lipa, Rita Ora, ose dikush më e madhe se këto emra, ajo u përgjigj:
Tani Dua Lipa dhe Rita Ora e kanë fituar famën e tyre jashtë Shqipërisë. Unë dua që të krijoj diçka në Shqipëri. Vërtet jetoj në Angli, por dua që gjënë time ta krijoj në Shqipëri.
Kjo është prej faktit se për të krijuar një karrierë ndërkombëtare është më e vështirë sesa në vendin e saj, apo thjesht çështje dashurie për Shqipërinë?
Mendoj që është një miks i shumë gjërave. Normalisht edhe këtu kam tentuar goxha herë, por nuk na ikën zemra ne nga Shqipëria. Aq më tepër që unë kompozoj muzikën time dhe normalisht më vjen më natyrshëm që të shkruaj tekstet e mia shqip edhe, duke u rritur me muzikë shqiptare, i di më mirë trendet që publiku pëlqen, ose mënyrën e promovimit të këngëve në momentin që lancohen.
