Një bashkëpunim që tërhoqi menjëherë vëmendjen e publikut. Lore bashkon forcat me MC Kreshën për të sjellë një super hit.
Kënga më e re “Ni Ni” sjell bashkë dy emra që prej vitesh kanë ditur si të ndërtojnë identitet të fortë muzikor, Lore dhe MC Kresha. Ky bashkëpunim nuk vjen thjesht si një duet i rastësishëm, por si rezultat i një kimie artistike që ndihet qartë që në dëgjimin e parë.
Kënga “Ni Ni” është shkruar, kompozuar dhe xhiruar para hyrjes së Lore në “Big Brother VIP”. E shkruar nga Alban Kondi, kënga lindi spontanisht dhe u shndërrua shpejt në një bashkëpunim me MC Kresha. “Ni Ni” flet për një flirt modern, ku secili pret mesazhin e tjetrit, një situatë ku shumëkush e gjen veten.
“Ni Ni” është një kombinim i zgjuar mes energjisë dhe rimave që e karakterizon MC Kreshën, ndërsa Lore sjell një ndjeshmëri melodike që e zbut dhe e thellon atmosferën e këngës. Ajo që e bën këtë këngë të veçantë është balanca mes dy botëve artistike. MC Kresha i mbetet besnik stilit të tij, i drejtpërdrejtë, ironik dhe me një prani të fortë, ndërsa Lore ofron një kontrast emocional që e pasuron narrativën e këngës.
Nuk ka përplasje stilesh, por një dialog natyral që funksionon pa sforcim. Kimia e tyre artistike ndihet autentike, Lore dhe MC Kresha tregojnë se kur ka vizion të përbashkët, rezultati flet vetë.
