I ftuar në “Live From Tirana” ka qenë Bennito Haskaj, muzikanti mjaft i talentuar në tregun muzikor. Ai na ka treguar më shumë mbi projektet e tij, marrëdhënien me artistët e tjerë, por dhe sfidat dhe vështirësitë e karrierës së tij…

A ka ndonjë ndryshim nga publiku në Shqipëri me atë në Kosovë, apo edhe në Diasporë?

Nëse marrim ndryshimin në koncerte, është shumë i madh. Sipas meje publiku në Shqipëri është shumë i ndezur, shumë i dashur. Edhe në Kosovë janë shumë të mirë, por janë më të mbyllur, nuk e shfaqin shumë atë që ndjejnë. Ndërsa në Diasporë janë shumë të dashur pas muzikës shqiptare, e duan dhe e vlerësojnë shumë. Na kanë pritur shumë mirë. Nuk ka ndonjë dallim shumë të madh, por unë në Shqipëri ndihem më mirë.

Si lindi bashkëpunimi yt i fundit më Big Bastën, “Guantanamo”?

Kemi pasur kontakt në Instagram. Kisha një demo të gatshme, kisha qejf të bëja diçka më Hip Hop. Mendoja që Big Basta është një nga reperët më old-school dhe e gjeja shumë mirë dhe i shkruajta për të bërë diçka bashkë. E pëlqeu dhe tha që e nisim menjëherë. Për dy javë e kemi mbaruar të gjithën, regjistrimin dhe klipin në Tiranë dhe brenda 1 muaj ka dalë në YouTube.

Deri më tani ke bashkëpunime vetëm me artistë të Shqipërisë, po me të Kosovës kur do të kesh?

Deri më tani kam vetëm 3 bashkëpunime. Me të Kosovës, ata që doja unë ishin të zënë me kohën. Unë jam tip që kam qejf që të mos i stërzgjas shumë projektet. Çdo 2 apo 3 muaj e lançoj një këngë. Disa me të cilët kam folur, kishin shumë angazhime. Tani po diskutojmë që të bëjmë diçka shumë të mirë në pranverë dhe do e bëj një bashkëpunim me një ndër artistët me zërin më të mirë në Kosovë.

Ka një këngëtar të mbivlerësuar në treg?

Shumë. Nuk i them dot me emra konkretë. Jam rritur me muzikë, por mendoj që këngëtarët po i bën të famshëm TikTok-u. Unë këtë nuk e vlerësoj. Njerëzit po humbin shumë kohë aty. Janë bërë të gjithë superstars në TikTok.

Po artistë të nënvlerësuar?

E vlerësoj shumë Stinen, duket që është lënë pak anash. Ka kapacitet dhe bagazh karriere shumë të madh. Edhe Flori Mumajesi. Më duket që ikonat që kanë qenë dikur nuk po vlerësohen më. Jo siç po vlerësohet një këngëtar i ri që bën ‘beef’ me dikë tjetër. Po vlerësohet më shumë sharja se sa muzika. Muzikën ti e ndjen.

A ka sfida industria e muzikës?

Nëse nuk ke lek, më mirë mos e nisni fare. Çdo gjë është leku. Nëse nuk ke lek, nuk merret njeri me ty, nuk të japin asnjë takim, as producenti apo tekstshkruesi. Nëse do të bësh një projekt që vlerësohet, të duhen 5000 euro. Suksesi nuk është i garantuar, por është për të bërë diçka me kualitet. Me kaq mund të bësh një spot dhe këngë së bashku. Ke pastaj dhe 10 mijë apo 15 mijë.

Ke ndonjë projekt të ri me të cilin po punon?

Për momentin kam një Hip Hop ritmike e përzier me turbo, është shumë ritmike dhe shumë melodike. Do të dalë në shkurt ose në mars. Tek ky projekt jam vetëm.