Kanë kaluar 12 vite që kur muzika shqiptare humbi një prej artistëve të saj të veçantë, Florian Kondin, i njohur për publikun si Dr. Flori. Artisti u nda nga jeta më 17 nëntor 2014, në moshën 35-vjeçare, por kujtimi i tij mbetet ende i gjallë.

Në këtë përvjetor të dhimbshëm, nuk kanë munguar homazhet nga njerëzit që e kanë njohur nga afër. Miri dhe Landi, miqtë dhe bashkëpunëtorët me të cilët Dr. Flori krijoi grupin e njohur “West Side Family”, kanë zgjedhur ta kujtojnë përmes postimeve në rrjetet sociale.

Miri ka ndarë një fotografi bardhezi të artistit, të shoqëruar me disa fjalë të ndjera, ku ka rrëfyer se mungesa e tij vazhdon të ndihet çdo ditë, pavarësisht viteve që kanë kaluar.

“I dashur Flor, edhe pse ke 12 vjet i larguar nga kjo bota jonë e përditshme, ta dish që më mungon shumë, ditë për ditë më mungon, sepse ti ishe një shok i vërtetë, ishe një mik që më duhej gjithmonë”, ka shkruar ai.

Dedikimin e tij, Miri e ka mbyllur me një mesazh të shkurtër, por plot emocion: “Shumë mall për ty, Flor”.

Edhe Landi ka përkujtuar mikun e tij të ndjerë, duke publikuar një fotografi nga një prej momenteve të tij në skenë. Krahas imazhit, ai ka ndarë edhe disa vargje prekëse që flasin për dhimbjen e humbjes dhe kujtimet që mbeten pas largimit të një njeriu të dashur, ku përmendet edhe emri i Dr. Florit.

Gjatë karrierës së tij, Dr. Flori la gjurmë të rëndësishme në muzikën shqiptare, fillimisht si pjesë e “West Side Family” dhe më pas përmes projekteve të tij solo. Këngët e tij u kthyen në hite dhe vazhdojnë të dëgjohen edhe sot. 12 vite pas largimit të tij, Dr. Flori mbetet një emër i paharruar për publikun shqiptar.