Lindon Berisha është një artist shumë i talentuar i skënës muzikore shqiptare, por që kohët e fundit ka bërë një shkëputje. Megjithatë, ai është rikthyer tashmë më fuqishëm se kurrë në muzikë, me një rikrijim të këngës hit “Ëndërr”, të babait të tij, Agron Berishës. I ftuar në “S’e luan topi” në Top Channel, Lindoni foli më shumë për këtë këngë të re dhe mesazhin që dëshiron të përcjellë përmes saj…

Në 2009 vjen në Top Fest me “Bye Bye” dhe më pas vjen hiti “Dale” e disa bashkëpunime të suksesshme me Adrian Gaxhën. Si ishte kjo periudhë për ty?

Ajo ka qenë epoka kryesore e muzikës që iu futa seriozisht dhe me plot profesionalizëm. Ka qenë një periudhë shumë e bukur, me hite, me shumë koncerte. Aty mori një kthesë serioze jeta ime në anën artistike dhe i theva disa barriera në vete si artist.

Pas këtyre hiteve bërë një shkëputje, çfarë ndodhi?

Atëherë në pandemi ndodhën disa kthesa në jetë dhe isha pak i dëshpëruar nga disa fenomene në treg, që nuk mund të bëja kompromis. Dhe filloi të më mungonte kjo pjesa kreative që të shkruaja për të tjerë, të jap tekste, të jap nga muzika ime. Dhe ashtu ndodhi. U zhgënjeva pak nga shumë ndryshime. Pastaj erdhën disa platforma, si TikTok dhe nuk mund ta kapja atë hapin që të dal shumë nga vetja.

Tashmë rikthehesh shumë fuqishëm me një rikrijim të këngës ikonike të babait tënd, Agron Berisha, “Ëndërr”. Pse e zgjodhe Luizin? Ndikoi fakti që ai këndonte këngët e babait në shtëpinë e “Big Brother VIP”?

Po, ajo ka qenë shtysa e parë që më bëri të merrja guximin dhe ta gjeja kontaktin që të arrij deri tek ai. Besoj që zëri i tij, ngjyra, timbri, ia kanë dhënë atë peshën që unë e doja. Mendoj se iu përshtat për mrekulli kjo këngë dhe atij i pëlqeu. Gjithçka erdhi shumë natyrshëm.

Po mendon që në të ardhmen të sjellësh dhe këngë të tjera të babait tënd, të ripunuara?

Ky është vetëm fillimi, një nisëm e ciklit të bashkëpunimeve që do sjell. Do ketë ndodhta 5 ose 6 këngë të Agronit që dua t’i ripërpunoj dhe t’i sjell në këtë frymën pak më moderne. Ajo është më e pakta që mund të bëj për babain.

Pse zgjodhe pikërisht “Ëndërr” si këngë të parë?

Përveç se Luizi e dëshironte si këngë, edhe për mua ka qenë një barrë e madhe sepse që atëherë, “Ëndërr” ka qenë një projekt i kuruar në detaje, ja qenë një copë shprese, një vizion i tij për eksodin masiv që ka ndodhur ndër vite. Dhe fatkeqësisht ende ndodh në kohët që jetojmë tani. I ka kënduar ëndrrës, që të arrijnë fjalët e tij nga thellësia e shpirtit tek e dashura e tij, mund të jetë nëna ose e dashura. Nëpërmjet kësaj kam dashur ta shfaq këtë projekt si një thirrje, që të ketë ndonjë ndikim tek të dashurit tanë që i kemi jashtë që të kthehen në tokën tonë të bekuar dhe t’i vazhdojnë ëndrrat këtu.