Nëse nuk keni ‘vuajtur’ mjaftueshëm me “Don’t Break It”, Yon Idy kthehet sërish për t’ju prekur telat e zemrës.
Pas suksesit të versionit origjinal, Yon Idy vjen sërish me një përjetim të ri të këngës “Don’t Break It”, këtë herë në një version akustik që prek zemrën me thjeshtësinë dhe emocionin e tij të pastër.
Në këtë variant, artisti heq dorë nga prodhimi elektronik dhe kthehet tek rrënjët e vërteta. Zëri, kitara dhe ndjenjat, vijnë në një formë tërësisht të ‘zhveshur’.
Akustika e bën këngën më intime, duke nxjerrë në pah tekstin e ndjeshëm dhe interpretimin e ngrohtë që e karakterizon Yon Idy. Kënga reflekton frikën e humbjes, por njëkohësisht edhe shpresën që ndjenjat e vërteta të mos thyhen.
Në versionin akustik, çdo varg tingëllon më i afërt, më personal, sikur artisti ta këndonte vetëm për ty. Ky publikim tregon edhe një herë anën e ndjeshme dhe të vërtetë të Yon Idy, duke e bërë “Don’t Break It (Acoustic)” një dëshmi të fuqisë që ka muzika kur shprehet me shpirt dhe pa zbukurime.
