“Është zhdukur kreativiteti tek artistët”/Shaolin Gang: Sot ka më shumë prodhim se kualitet!

“A je bre normal” nga Meriton Mjekiqi shquhet për mënyrën unike se si sjell histori nga jeta e artistëve, sukseset dhe sfidat e tyre, duke ofruar një pasqyrë të thellë të jetës së VIP-ave. Të ftuar në episodin e radhës kanë qenë DJ Blunt dhe Real 1, ndryshe Shaolin Gang, në një intervistë speciale. Shaolin Gang kanë diskutuar mbi albumin e tyre të ri, planet në muzikë, si dhe kanë treguar si e shohin industrinë e muzikës sot…

E keni menduar ndonjëherë të ktheheni në Blunt dhe Real 1?

Jo, tani jemi Shaolin Gang. Ka rast që kemi bërë ndonjë komercial por që kur e kemi nisur Shaolin, ka mbetur Shaolin. Ne e kemi kryer atë pjesë. Ka kaluar ajo kohë e jona. E kemi çuar lojën në tjetër gjë tani. Që kur kemi krijuar Shaolin, kemi ndalur së qenuri Blunt dhe Real 1. Kjo është e ardhmja jonë. Tani jemi Shaolin dhe bëjmë tjetër gjë, tjetër muzikë, kjo është komplet tjetër gjë, tjetër karakter.

Pse nuk është më showbizi në nivelin e duhur siç ka qenë para disa vitesh?

Mendoj se është zhdukur kreativiteti tek industria, tek artistët. Këngët po i bëjnë shumë të shpejta dhe të njëjta. Më shumë ka prodhim se kualitet. Vetëm po nxjerrin, por nuk po zgjasin. Tani nuk ke më këngë që të mbeten me vite. Harrohen menjëherë. Madje edhe artisti nuk ta këndon në koncert.

Pse nuk është më kualiteti?

Sepse njerëzit nuk bëjnë më muzikë për ta dëgjuar për qejf publiku. E bëjnë muzikën vetëm për të hyrë në club, vetëm për të kënduar këngën shpejt. Kreativiteti ka humbur. Dhe publikut i duket sikur janë bërë krejt të njëjtë. Publiku nuk është se po i dëgjon shumë këto. Më shumë vlerësohen këngët e vjetra, hitet e vjetra. Njerëzit janë rritur me hitet e vjetra dhe e kanë testuar kohën. Për të mbetur një hit klasik, duhen kaluar më shumë se 10 vite.

Ju po nxirrni albumin e tretë “Tululu 3” dhe nuk ka asnjë bashkëpunim, pse?

Pak a shumë asnjë “Tululu” nuk mban bashkëpunime. Është diçka personale e jona dhe është tjetër nivel, edhe muzika, edhe tekstet. Ndoshta nuk na është përshtatur dikush 100% që të hyjë në atë ‘vibe’ të Shaolinit.

A po bën muzikë të mirë gjenerata juaj?

Kohëve të fundit nuk ka pasur një produkt të mirë, me sa kam dëgjuar. Po mundohen të bëjnë komerc. Duket sikur janë lodhur.

A do të donit të bënit një koncert tuajin dhe të ftonit artistët me të cilët keni bashkëpunuar?

Ne kemi bashkëpunuar me gjithë industrinë, vetëm tek Shaolin Gang është pak më ndryshe. Por normal që do kishim dëshirë të bënim një koncert të madh ku i këndojmë të gjithë këngët.

Cili ka qenë momenti më kritik për Shaolin Gang dhe a keni menduar për ta lënë përgjithmonë muzikën?

Jo, ne tani po bëjmë albumin “Tululu 3” dhe e sigurtë që ka për të pasur dhe “Tululu 4” dhe “Tululu 5”. Pastaj nuk i dihet, mbase nuk jemi më të inspiruar dhe e lëmë. Por me Shaolin do vazhdojmë.

Një nga këngët e juaja të fundit është “Rick & Morty”, pse ky titull?

Rick & Morty janë dy shkencëtarë si ne, ashtu special. Permendet në këngë dhe ia lamë “Rick & Morty”. Tani po nxjerrim single-in e dytë, kemi qejf që të nxjerrim këngë çdo muaj, por jo me klip njëherë, dhe me nxjerrë gjysmën e albumit.