Kjo javë na duket si një déjà vu e vërtetë. Më saktësisht sikur jemi kthyer pas në kohë në vitin 2021.
Hiti i padiskutueshëm i atij viti, si për çudinë tonë është rikthyer sërish në klasifikimin e “The Top List”. Po flasim për “Nina” nga Bruno, Flori Mumajesi dhe Klajdi Haruni.
Kënga na ka surprizuar edhe njëherë tanimë me rikthimin e saj, duke marrë mjaftueshëm vota nga publiku dhe fansat e tre artistëve. “Nina” ishte një ndër projektet më të suksesshme të asaj vere, por edhe më gjatë.
Kjo vërtetohet edhe njëherë me rihyrjen në listë këtë javë. “Nina” asokohe ka qenë gati-gati në ‘luftë’ me një tjetër projekt, “Dale” nga Butrint Imeri, Kida dhe Ledri Vula.
Herë njëra kënga e herë tjetra, ishin hap pas hapi me njëra-tjetrën jo vetëm për vendin e parë, por dhe për statusin ‘projekti më i mirë veror i 2021’. Epo, fakti që këtë javë po përballemi me një rikthim të “Nina”, na lë të kuptojmë se ky hit vazhdon të rezistojë dhe kështu do ndodhë edhe për një kohë të gjatë.
