Nora Istrefi na rikthen pas në kohë me një hit ‘Evergreen’. Artistja ka surprizuar publikun duke risjellë në version të ri këngën “Me ritëm do vallëzoj”, hitin e njohur të Eliza Hoxhës nga vitet 2000.
Kënga origjinale ka qenë një prej projekteve më të pëlqyera të asaj kohe dhe është kujtuar shpesh për ritmin e gjallë dhe atmosferën pozitive që krijonte. Edhe ky version i ri premton të sjellë energji të lartë për publikun.
Me rikthimin e saj, Nora i ka dhënë këngës një frymë moderne, duke kombinuar stilin e saj karakteristik me nostalgjinë që sjell kënga e vjetër. Ky projekt është pritur mirë nga fansat, të cilët e vlerësojnë si një mënyrë të bukur për të rikthyer në vëmendje muzikën e viteve të 2000-ta, por edhe për t’i dhënë asaj një jetë të re.
Rikrijimi i këngëve të vjetra po bëhet gjithnjë e më i zakonshëm në muzikën shqiptare, dhe versioni i Norës tregon se si një hit i dikurshëm mund të përshtatet lehtësisht me trendet e sotme, duke ruajtur shpirtin e vet origjinal.
