Olimpia Smajlaj ka ditur si të vijë gjithmonë ndryshe dhe në mënyrë unike në tregun muzikor shqiptar. Së fundmi ajo ka publikuar projektin e saj më të ri që ka hyrë këtë javë në “The Top List”, “No goodbyes”.
Kjo këngë që vjen në shqip dhe anglisht, eksploron temat e largësisë dhe mallit për njerëzit e afërm që ikin jashtë shtetit, duke sjellë një mesazh të thellë dhe të ndjerë për shumë familje shqiptare. Pikërisht kjo tematikë ka bërë që njerëzit të dashurohen edhe më shumë pas saj.
“No goodbyes” përmban elemente të retro pop-it që të kujtojnë muzikën e viteve ’80 dhe ’90, por të sjella me një vibe modern. Ky stil nostalgjik, i përzier me tekstin emocional, krijon një atmosferë që të tërheq dhe të bën të reflektosh mbi ndjenjat e mallit, largësisë dhe ndryshimeve të kohës.
“No Goodbyes” frymëzohet nga kohëra më të thjeshta si fëmijëria, adoleshenca dhe lumturia e një jete më të ngadaltë, ku të gjithë mund t’i gjeje në të njëjtin qytet. Sipas Olimpias, kënga i dedikohet motrës dhe shoqes së ngushtë së saj, të cilat të dyja kanë zgjedhur të jetojnë jashtë Shqipërisë.
Projekti i Olimpias është përqafuar nga publiku dhe nuk kishte si të mos vlerësohej stili dhe veçantia që ajo sjell. “No goodbyes” në fakt të ngjason me një projekt k-pop, muzika koreane aq në trend kohët e fundit, si nga stili por po ashtu edhe zgjedhja e videoklipit.
