Këngëtarja shqiptare Bleona Qereti është rikthyer me një projekt të ri muzikor, në mënyrë unike siç di vetëm ajo. “Stani” titullohet kënga e re që ndërthur muzikën shqipe me një frymë bashkëkohore dhe provokuese.
Me publikimin e këngës së saj më të re “Stani”, Bleona ka ngritur edhe një herë zërin për të globalizuar muzikën shqiptare. Me fuqinë e saj të jashtëzakonshme, Bleona ka arritur të tërheqë vëmendjen e miliona njerëzve.
Kjo këngë, një ripërpunim i perlës kulturore shqiptare të shkruar nga Lasgush Poradeci për sopranon Tefta Tashko Koço, tregon vendosmërinë e Bleonës për të përçuar traditën e kombit tonë në skenën ndërkombëtare. “Stani” nuk është thjesht një interpretim, por një rikthim që e sjell muzikën tonë më afër brezit të ri global.
Duke shfaqur guximin dhe krenarinë e saj të njohur, Bleona vjen si një “Amazonë Moderne” që përmes këtij versioni rithemelon fuqinë e grave dhe karakterin e fortë të artistit shqiptar. Videoklipi, frymëzuar nga mitologjia greke dhe Amazonat, gratë luftarake, të pamposhtura dhe krenare, është një vepër arti që pasqyron bukurinë vrastare dhe komandën absolute të një gruaje që sfidon normat e vendosura.
Në klip, Bleona magjeps të gjithë, duke komanduar një tigër të brendshëm që simbolizon tërheqjen e saj të pakontrolluar dhe ndikon mbi çdo audiencë që e ndjek. Është hera e parë në historinë e muzikës shqiptare që një label amerikan do të promovojë dhe shpërndajë muzikë shqiptare.
Kjo arritje dëshmon se “Stani” është vetëm fillimi i një dekade të re për Bleonën, që premton t’i sjellë muzikës shqiptare jehonë botërore. “Stani” e ka renditur Bleonën në vend të tretë këtë javë.
