E ftuar në “Live From Tirana” ka qenë këngëtarja e talentuar Inis Neziri. Ajo ka folur më shumë mbi këngën e saj më të re, “Qaj e qesh”, që është bërë këtë javë pjesë e klasifikimit të 100 këngëve më të mira shqiptare në “The Top List”, Top Awards.
Si erdhi “Qaj e qesh”?
“Qaj e qesh” është një projekt shumë i dashur për mua, kam disa kohë që po e punoj. Teksti është shumë i veçante dhe aktual, pasi flet për kontradiktën mes ndjenjave, që edhe qajmë me kujtimet, por në të njëjtën kohë dhe i vlerësojmë dhe qeshim me to.
Si kanë qenë komentet që ke marrë?
Deri tani shumë pozitive, mendoj që është një projekt që mua më përfaqëson shumë mirë, brenda kontureve të mia. Dhe publiku e ka pritur shumë mirë dhe i falënderoj për mbështetjen që kanë dhënë gjithmonë.
Cila është dëshira jote mbi karrierën që ke?
Dëshira është që të eci sa më shumë në treg. E vogël kam dashur që të jem pjesë e tregut të huaj. Por është pak e vështirë që të hysh edhe në tregun tonë, jo më atë të huaj. Fillimiusht dua të fokusohem më shumë në projektet e mia solo, po ashtu dhe bashkëpunime nëse më jepet rasti. Të qëndroj brenda kontureve të mia, të bëj projekte të mira që dhe pas disa vitesh kur t’i dëgjoj të them ‘kjo isha unë’.
Si do të jetë kjo verë për ty?
Kam bërë balada pafund, tani më duhet pak ajo energjia verore. Këtë vit do të bëj këngë verore.
