Elgit Doda ka vetëm dy javë që ka publikuar projektin e tij më të ri muzikor të titulluar “Asaj”. Këtë javë, këngëtari dhe kantautori është bërë për herë të parë, pjesë e klasifikimit të “The Top List”, falë këtij projekti muzikor.
I kontaktuar nga “Top Awards”, artisti ka zbuluar më shumë detaje sa i përket “Asaj” si dhe ka treguar planet për këtë verë.
TA: Na zbuloni më shumë për këngën tuaj të re “Asaj”, për çfarë flet ajo?
Elgit Doda: Teksti flet për një dashuri të humbur, shkaqet nuk dihen…(enigmë).
TA: Ai dedikohet kjo këngë një personi të veçantë?
Elgit Doda: Tema është diçka që ndodh shpesh, çdo kush mund ta gjejë veten në tekst.
TA: Kush është kujdesur për videoklipin dhe ku është xhiruar ai?
Elgit Doda: Video është punuar nga Provideo Albania dhe është xhiruar në Vlorë.
TA: Brenda një periudhe shkurtër, keni publikuar dy projekte muzikore, mendoni se duhet të kishit lënë më shumë kohë mes dy projekteve?
Elgit Doda: Besoj se nuk ka afat kohor për këtë gjë, thjesht kështu më erdhi ta bëja…
TA: Kantautor dhe këngëtar, cilin preferon më shumë?
Elgit Doda: Secila ka kënaqësinë e vetë si të jesh këngëtar ashtu edhe të krijosh muzikë për këngëtarë të tjerë. Nuk i ndaj dot.
TA: Preferon më shumë bashkëpunimet apo këngët “solo”?
Elgit Doda: Varet nga materiali që punoj, si më përshtatet më shumë por bashkëpunimet sigurisht që kanë një tjetër vlerë.
TA: Kjo verë do të sjellë diçka të re nga ju?
Elgit Doda: Akoma nuk kam filluar, do kem shumë projekte këtë vit
TA: Kjo është hera e parë që jeni pjesë e klasifikimit të “The Top List”, si ndiheni për këtë?
Elgit Doda: Kur puna e një artisti vlerësohet sigurisht që ndihem i kenaqur…
TA: Një mesazh për fansat tuaj…
Elgit Doda: Do jem gjithmonë pranë jush me muzikën time për t’ju mbushur shpirtin. JU DUA
