Të ftuar në “Live From Tirana” me Edea Demaliaj, kanë qenë grupi Shkodra Elektonike, Beatriçe Gjergji dhe Kolë Laca. Me këngën e tyre “Zjerm”, ata përfaqësuan denjësisht Shqipërinë në Eurovision 2025 dhe fituan zemrat e gjithë publikut. Shkodra Elektronike erdhën me një rrëfim të sinqertë mbi ndjesitë e tyre, emocionet, por dhe shumë detaje të tjera të pathëna…

Si jeni takuar dhe jeni bërë bashkë?

Beatriçe: Ne jemi takuar në internet, Kola ka pasur një grup dhe i kam gjetuar disa video në YouTube. I kam dërguar një mesazh që ‘faleminderit për atë që po bën’. Ka qenë një surprizë e madhe për të zbuluar një artist shkodran alternativ. Ka qenë 2014-2015, kam qenë e re, nuk e kam menduar që Kola kishte qejf për t’u bërë një grup.

Kola: Është dashur kohë ta mendojmë projektin. Kisha disa kohë duke eksperimentuar, derisa kur më shkruajti Beatriçe. Më pëlqeu si këndonte, atituda e saj në skenë. Por në atë kohë nuk kisha diçka konkrete. Pasi mbarova turnetë me grupet e tjera, pastaj iu dedikova këtij projekti. Kemi bërë dy ditë prova bashkë dhe pastaj kemi filluar të bëjmë koncerte.

Sa e rëndësishme është për ju që të jeni autentikë?

Kola: Nuk ka rëndësi për ne. I bëjmë gjërat si na duken bukur, si na pëlqejnë ne. Nëse njerëzve u duket autentike, na bëhet shumë qejfi. I qëndrojmë këtij autenticiteti, nuk dimë ta bëjmë ndryshe. Mbase dhe mund ta provojmë (qesh).

A ka qenë qëllimi juaj që me muzikën tuaj të riktheni folklorin shqiptar edhe tek brezat e rinj?

Beatriçe: Ai është koncepti i Shkodrës Elektronike. Ne na ka lidhur të dy një këngë, dashuria që kemi për këngët shkodrane e pastaj kemi zbuluar dhe këngë të tjera shqiptare. Kur kemi filluar, koncepti ka qenë që të rikthejmë këto këngë kaq të bukura, që nuk njihen shumë jashtë Shqipërisë. Pak njerëz i njohin këngët shkodrane. Pastaj kombinimi me muzikën elektronike, i tërheq njerëzve të rinj. Dëgjuesit janë dhe më të rinj se ne (qesh).

Kola: Kjo është Shkodra Elektronike.

Cili ishte qëllimi i konkurrimit në Festivalin e Këngës? Çfarë pritshmërish kishit?

Beatriçe: Kur kemi filluar të shkruajmë këngën “Zjerm”, për të provuar të fusnim emrin tonë në festival dhe shkoi mirë se kënga u zgjodh, por ne e kemi bërë vetëm për t’u prezantuar emrin tonë njerëzve që flasin gjuhën që ne këndojmë. Kemi pasur albumin gati, donim që edhe fansat të na dëgjonin nëpër rrjete sociale. Kemi pasur më shumë dëgjues se sa fansa, njerëz që na ndjekin për muzikën ishin shumë. Kjo ka qenë pritshmëria, ajo që kërkuam ne nga festivali.

A e keni pasur presionin për ta bërë këngën më të përshtatshme për Eurovision?

Kola: Jo, ne nuk e kemi menduar këtë gjë. Mendoj që bukuria e festivalit është që shkohet aty me këngë shqiptare, për të fituar festivalin shqiptar. Festivali i Këngës është një festival me traditë, pastaj fakti që fituesi shkon në Eurovision, e bukur është që të jetë një këngë shqiptare.

Si ka qenë ndjesia e përfaqësimit të Shqipërisë në Eurovision?

Beatriçe: Ne e kemi ndierë mbështetjen e njerëzve që ditën e parë dhe për mua nuk ka qenë peshë, ka qenë motorr. Me këtë mbështetje, e me mesazhet që na kanë ardhur, kjo gjë na ka dhënë forcë. E kam ndierë si përgjegjësi për të shkuar e përgatitur, për të bërë maksimumin. Kam punuar shumë për këtë gjë. E kam konsideruar si punë, për të mos futur shumë emocionet e mia, por ta mendoj si diçka që do jap maksimumin tim. Frika ime ka qenë mos të zhgënjej njerëzit.

Kola: Ka qenë mendimi për t’i bërë gjërat sa më mirë. I vetmi ndryshim nga Beatriçe, është se pjesa ime ka qenë tepër e thjeshtë, nuk kam pasur shumë nevojën për t’u përgatitur.

Si erdhi kënga “Zjerm”?

Beatriçe: Kola më tha që të provoja të shkruaja një këngë për festival. Se këngët e albumit nuk ishin shumë për festival, kanë një mënyrë dhe strukturë që nuk është për festival. Atëherë pasi më tha Kola që të provoja të shkruaja një këngë për festival, nisa të shkruaja “Zjerm” dhe ia nisa demon. Teksti i pjesës sime është bërë nga unë, kurse pjesa e Kolës është bërë nga Lekë Gjeloshi.

Leka: Unë e kam shkruar për shkak të marrëdhënies që kam me gjuhën, edhe kryesisht me dialektin geg, të cilën e flasim të tre. Kjo gjuhë ka një komponent të brendshëm fonetik muzikor shumë të fortë, e cila u lidhte ngushtë edhe me timbrin që ka Kola. Pastaj dhe me narracionin që kishte filluar të shkruante Beatriçe, me imazhet e saj më të pastra e më ideale. Tek momenti i Kolës u bënte e nevojshme edhe prej zhvillimit muzikor me sintetizatorët, të futej diçka më e errët, më shkundëse. Diçka që ruan gjuhën e eposit tonë, letërsisë sonë epike, deri tek ajo modernia dhe më hermetikja, ku gjërat janë më të kriptuara, por që të lënë atë shijen e perceptimit. Në këtë sens është përdorur fjala “Zjerm” sepse ka diçka përfshirëse, të brendshme. Duke qenë dhe unë fans i muzikës pak më rock, më pëlqente të kisha një komponent të fortë. Deri diku Migjen-ian, në kuptimin thirrmor të fjalës, një revoltë, që më pas Kola e zhvillonte me teatralitetin e vet statik.