Sot në emisionin “Live from Tirana” ishte i ftuar reperi i njohur Big Basta për të na folur më shumë për projektin e tij të fundit të titulluar “Guantanamo” në bashkëpunim me muzikantin mjaft të talentuar në tregun muzikor Benniton. Si lindi ky bashkëpunim me Bennito-n?
Lindi krejt natyrshëm. Bennito është një artist shumë korrekt. Që nga komunikimi i parë e kam kuptuar këtë gjë. Ne bashkë kemi miq të përbashkët, ai gjeti mënyrën për të komunikuar me mua, m’u prezantua dhe thash ‘pse jo’. Nisi bukur dhe përfundoi bukur. U zgjodh një producent i mirë për këtë këngë dhe që në momentin e parë që dëgjova muzikën m’u kujtuan hitet e vjetra dhe thash ‘kjo vlen’. Unë mendoj se artisti duhet të jetë i njëjtë si në skenë ashtu edhe jashtë skene. Bennito është shumë korrekt, më pëlqeu shumë komunikimi me të.
Prej disa vitesh Big Basta ka jetuar në Zelandën e Re duke i munguar tregut muzikor shqiptar. A është kthyer Big Basta në Shqipëri për të mos u larguar më dhe si ishte eksperienca e tij në atë vend?
Ishte e bukur. Është shumë larg dhe më pengonte se nuk isha afër familjes time. Edhe kur doja t’i merrja nuk e kishin me qejf sepse janë shumë orë udhëtim. U rrita me atë eksperiencë, kisha nevojë të rritesha, edhe djali të rritej në një vend të mirë. Në atë vend nuk ka korrupsion, kjo më mungon. (qesh)
