Babastars rikthehen fuqishëm në skenën muzikore me projektin e ri “High 10”, duke dëshmuar edhe një herë se mbeten ndër grupet më influente të hip-hopit shqiptar. Publikimi i këngës ka zgjuar menjëherë interesin e fansave, të cilët prej kohësh prisnin një bashkim të ri të emrave kryesorë të labelit.
Në “High 10”, Babastars vijnë të unifikuar, duke përfshirë disa prej figurave më të rëndësishme të tyre. Gheto Geasy, Majk, Skivi, Onat dhe Cozman kanë bashkuar energjitë dhe stilet e tyre, duke krijuar një projekt që synon të bëhet një nga hitet e sezonit.
Teksti, linjat melodike dhe interpretimet individuale reflektojnë identitetin karakteristik të secilit artist, ndërsa në të njëjtën kohë ruajnë koherencën që Babastars di ta sjellë në bashkëpunimet e veta.
Reagimet nga publiku nuk kanë munguar, me qindra komentues që kanë shprehur emocion, kureshtje dhe dëshirën që grupi do të rikthejë energjinë dhe stilin që i bëri dominues në muzikën moderne shqiptare. Rikthimi i një projekti të përbashkët shihet nga fansat si rikthim i identitetit origjinal të labelit, i cili dikur krijonte hite që vijojnë të mbeten referencë edhe sot.
Babastars ka qenë një prej grupeve më me ndikim në skenën e hip-hopit shqiptar, me një kontribut që ka lënë gjurmë në të gjithë gjeneratat. Edhe pse anëtarët ndoqën rrugë të ndryshme, kërkesa për ribashkim ka qenë e vazhdueshme. Dhe ja ku momenti i duhur erdhi dhe shpresojmë se “High 10” do të pasohet dhe nga shumë hite të tjera të reja…
