Karriera muzikore e Arbër Lufo filloi që në moshën 5-vjeçare, kur babai e regjistroi në kursin e pianos. Ky ishte hapi i parë drejt një udhëtimi të gjatë e të pasur me muzikë. Në moshën 12-vjeçare, pasionin e tij e pasuroi më tej duke filluar të mësonte kitarën dhe më vonë, u diplomua si kitarist klasik. Ky sukses i dha atij shtytjen për të thelluar njohuritë e tij dhe për t’u specializuar në Music Production dhe Sound Engineering, ku arriti rezultate të shkëlqyera. Edhe pse pjesën më të madhe të jetës së tij ka qenë i rrethuar nga muzika klasike, gjithmonë ka qenë i intriguar nga muzika perëndimore. Ky interes e ka ndihmuar Arbrin që të krijojë një stil unik që ndërthur harmoninë dhe strukturën klasike me energjinë dhe lirinë e formave bashkëkohore të muzikës. Si producent, pika e tij më e fortë është versatiliteti. Lufo ka aftësinë të krijojë këngë në zhanre të ndryshme, duke eksploruar një gamë të gjerë stilesh muzikore. Aktualisht, ai po konsideron rrugëtimin e tij si DJ, me fokus në Afrohouse dhe Deep House, një përzierje që përfaqëson tingullin e tij të tanishëm. Përveç kësaj, Lufo është aktiv në projekte komerciale, duke bashkëpunuar me artistë shqiptarë dhe të huaj, duke sjellë eksperiencën e tij në prodhimin e këngëve që përputhen me nevojat dhe vizionet e tyre. Çdo moment, Arbri thotë se është në kërkim të tingujve më të freskët dhe të rinj në industri, duke eksploruar dhe përshtatur elementë të ndryshëm për të mbajtur muzikën e tij gjithmonë të freskët dhe inovative.