Pas një hiti të padiskutueshëm “Verën tjetër”, AM rivjen në klasifikimin e javës në “The Top List” me një tjetër projekt. Kënga më e re e AM, “Larg u rrita”, vjen si një rrëfim intim për rritjen, largimin dhe peshën që mbartin rrënjët.
Që në dëgjimin e parë, kënga krijon një atmosferë reflektuese, ku teksti dhe melodia ndërthuren natyrshëm për të treguar një histori personale, por njëkohësisht universale. “Larg u rrita” flet për distancën jo vetëm fizike, por edhe emocionale.
AM e trajton temën e rritjes larg vendit, njerëzve apo ndjenjave që dikur kanë qenë shtëpi. Vargjet janë të thjeshta, por të drejtpërdrejta, duke lënë hapësirë që secili dëgjues të gjejë veten në to. Është ajo lloj kënge që nuk ka nevojë të shpjegohet shumë, sepse ndjehet.
Me “Larg u rrita”, AM dëshmon edhe një herë aftësinë për të kthyer përjetimet personale në art që komunikon me një publik të gjerë. Është një këngë për ata që janë larguar, për ata që janë rritur më shpejt seç duhej, dhe për këdo që e di se largësia ndryshon gjithçka, por nuk e fshin kurrë lidhjen me të kaluarën.
