Xhesika Polo është këngëtare dhe autore këngësh e njohur, si dhe një nga zërat më të fuqishëm femërorë në pop muzikën shqiptare. Karriera e saj si këngëtare fillon në vitin 2012, ku arrin të jetë finaliste e “X Factor Albania 1”. Që nga viti 2012 është pjesëmarrëse në festivale si në Shqipëri dhe përtej kufirit. Në vitin 2020 shpallet fituese e festivalit “Nota Fest” me këngën “Frymë”. Ka qenë 3 herë pjesëmarrëse në Festivalin e RTSH. Rikthehet për të shtatin vit në “Kënga Magjike” ku ndër vite është vlerësuar me çmime si: “Best FT”, “Best vocal”, “Çesk Zadeja”, “Çmimi i produksionit”, etj. Me zërin e saj ajo ka bërë për vete shumë fansa e megjithatë ajo tregohet modeste. Xhesika e ka muzikën në venat e saj. Mjafton të kujtojmë që ajo është mbesa e këngëtares së njohur të muzikës qytetare të Shqipërisë së Mesme, Valbona Mema. “Ambienti artistik ku jam rritur ka ndikuar vetëm pozitivisht”, tregon Xhesika, ndërsa shton se kjo gjë e ka shtyrë që të provonte veten në muzikë. Ajo njihet nga publiku si këngëtarja me zërin e fuqishëm.