Nini është një nga artistet më të reja në tregun muzikor. Ajo ka lindur dhe jeton në Tiranë. E lindur dhe e rritur në një familje artistesh ajo nuk kish si të mos bëhej pjesë e rrugës së artit. Gjyshi i saj ka qenë aktor e dramaturg i njohur. Xhaxhai i mamasë së saj kantautori i parë shqiptar, nëna e saj regjisore e aktore, ndërsa tezja e saj një artiste e njohur ku aktrimi dhe muzika janë armët e saj të forta me të cilat ka fituar çmime në festivale. E pikërisht me këtë të fundit ajo ka sjellë këngën e saj të parë në duetin “Një cigare“. Nini (Nicole Sula, që është emri i saj i vërtetë) në kuadrin e projekteve të shkollës “Sami Frashëri”, ka fituar edhe çmimin si aktorja më e mirë jo protagoniste në Festivalin e Teatrove midis shkollave të Tiranës. Gjithashtu ka qenë pjesë e disa roleve të spikatura në shfaqjet e vëna në skenë nga Klea Huta Akademi. Pasioni për muzikën e ka bërë që krahas aktrimit ajo të ndjekë mësime private në këngë dhe së shpejti do t’i vijë tregut muzikor edhe me këngët e saj të reja.