Albina Kelmendi ka lindur më 27 janar 1998 në qytetin e Pejës. Këngëtarja, e cila vjen nga një familje muzikantësh ka trashëguar prej tyre jo vetëm dëshirën dhe pasionin e madh për muzikë, por edhe një talent të jashtëzakonshëm. Ajo studioi klarinetë dhe piano në një shkollë muzikore në vendlindjen e saj dhe filloi të performojë së bashku me familjen e saj me emrin Family Band. Ajo u bë e njohur në vitin 2014, kur mori pjesë në sezonin e katërt të The Voice of Albania. Një vit më pas, ajo mori pjesë në edicionin e dymbëdhjetë të Top Fest, ku prezantoi këngën “Nuk ka ma mirë”. Në qershor 2022, Albina Kelmendi publikoi albumin e saj debutues, Nana loke. Në dhjetor të të njëjtit vit, ajo mori pjesë në Festivalin e 61-të të Këngës, ku prezantoi këngën “Duje”, në performancën e së cilës morën pjesë pesë anëtarë të familjes së saj me emrin Familja Kelmendi. Pavarësisht se u rendit në vendin e dytë në natën finale, rezultati i së cilës u vendos nga një juri, votimi i publikut e zgjodhi atë si përfaqësuesen shqiptare në Festivalin Evropian të Këngës 2023 në Liverpool të Mbretërisë së Bashkuar. Bashkëpunimi i saj me Aurela Gaçen në “Motra jem”, e sjell Albinën për herë të parë në mesin e artistëve të Top Awards.